Ọkammụta Alex Enukọra Anịmalụ.

N’ụbọchị taa n’afọ 1938 ka a mụrụ Alex Anịmalụ. Ọ bụ onye Ọba, nke dị n’okpuru ọchịchị Idemili South, L. G. A, Anambra Steeti. Ọ gara akwụkwọ Sekọndịrị na D. M. G. S, mechazịa gaa mahadum Ibadan.

Ebe a ka o ji nzere na “Maths” were pụta. Chike Obi sokwa bụrụ onye kuziiri ya na mahadum ahụ ọ gara. Ọ nwetakwara onyinye n’afọ 1961 na 1962, dịka nwaakwụkwọ kachaa mee ọfụma na ngalaba sayensị na mahadum ahụ.

Ọzọkwa, e nyere ya onyinye “Crowe’s Prize” tinyere ịgụ akwụkwọ n’efu. Ọ bụ onyinye ịgụ akwụkwọ efu a ka o ji gaa mahadum Cambridge na mba “United Kingdom” bido n’afọ 1962 ruo afọ 1965.

Ọ nọ mba “United Kingdom” na Amerịka ruo 1976, ebe ọ chọpụtara, ma dee akwụkwọ ụfọdụ na ngalaba ya dara ụda tutu ọ lọghachi Naịjirịa. E mekwara ya Ọkammụta na ngalaba “Physics” na mahadum Naịjirịa, Nsụka n’afọ 1976.

Ọ bụkwazi ya nyere gọọmenti ala anyị atụmatụ, e jiri guzo “Centre for Energy Research and Development” na mahadum Nsụka n’afọ 1980. Ọkammụta Anịmalụ azụọla ọtụtụ ụmụakwụkwọ na “Theoritical Physics” na “Solar Energy.” E mekwara ya “Emeritus Professor” nke mahadum Naịjirịa, Nsụka n’afọ 2006.

N’ezie, Ọkammụta Anịmalụ bụ oko osisi na ngalaba Sayensị, n’ala anyị na n’ụwa dum.